ފާސްޓް ފެޝަން ކުންފުނި ޝީން ހޮންގްކޮންގް ސްޓޮކް އެކްސްޗޭންޖުގައި ލިސްޓުކޮށް، ހިއްސާގެ ވިޔަފާރި ފެށި ފުރަތަމަ ދުވަހު އެ ކުންފުނީގެ ހިއްސާގެ އަގު ދަށަށް ހިނގައްޖެއެވެ.
ހޯމަ ދުވަހު ޝީން އިން އެ ކުންފުނީގެ ހިއްސާއެއްގެ އަގު ކަނޑައެޅީ 48.56 ހޮންގްކޮންގް ޑޮލަރަށެވެ. މި ލިސްޓިންގެ ތެރެއިން އެ ކުންފުނިން ވަނީ 13.6 ބިލިއަން ހޮންގްކޮންގް ޑޮލަރު (1.7 ބިލިއަން އެމެރިކާ ޑޮލަރު) ހޯދާފައެވެ. މިއާއެކު ކުންފުނީގެ ސްޓޮކް މާކެޓް ވެލިއުއޭޝަން ވަނީ 26.3 ބިލިއަން ޑޮލަރަށް އަރާފައެވެ. މިއީ މީގެ ކުރިން އެ ކުންފުނީގެ އަގު ހުރި ކަމަށް ލަފާކުރި 100 ބިލިއަން ޑޮލަރާ އަޅައި ބަލާއިރު ގާތްގަނޑަކަށް ހަތަރުބައިކުޅަ އެއްބައިގެ ދަށްވުމެކެވެ.
ވިޔަފާރި ފެށުނުތާ ކުރީކޮޅު ޝީންގެ ހިއްސާގެ އަގު 10 ޕަސެންޓަށް ވެއްޓުނު ނަމަވެސް، މެންދުރުވީއިރު އެ އަދަދު ވަނީ 3.5 ޕަސެންޓުގެ ދަށްވުމަކަށް ބަދަލުވެ، ހިއްސާއެއްގެ އަގު 47 ހޮންގްކޮންގް ޑޮލަރަށް ވުރެ ތިރީގައި ހިފެހެއްޓިފައެވެ. ލިސްޓުކުރުން ފާހަގަކުރުމަށް ބޭއްވި ރަސްމިއްޔާތުގައި ޝީންގެ ޗީފް ފައިނޭންޝަލް އޮފިސަރު ލީ ގީ ވިދާޅުވީ، އެ ކުންފުނީގެ އުފެއްދުންތައް މިހާރު ދުނިޔޭގެ 160 މާކެޓަކަށް ފޯރާ ކަމަށެވެ.
އިންވެސްޓްމަންޓް ބޭންކް ސަކްސޯގެ ޗީފް އިންވެސްޓްމަންޓް ސްޓްރެޓެޖިސްޓް ޗާރު ޗަނާނާ ވިދާޅުވި ގޮތުގައި، ފުރަތަމަ ދުވަހުގެ ނަތީޖާއިން ދައްކައިދެނީ ޝީންގެ ވިޔަފާރި އަލުން ކުރިއަރައިގެން ހިނގައިދާނެ ކަމާމެދު މާކެޓުން ޔަގީންކަން ނެތް ކަމެވެ. ލިސްޓުކުރުމުގެ ކުރިން ޝީން އިން ހުށަހެޅި ލިޔެކިޔުންތަކުގައިވާ ގޮތުން، މި އަހަރުގެ މާޗް މަހުގެ ނިޔަލަށް އެ ކުންފުނީގެ 273 މިލިއަން އެކްޓިވް ކަސްޓަމަރުން ތިބިއިރު، އެއް ބިލިއަނަށް ވުރެ ގިނަ އޯޑަރު ވަނީ ލިބިފައެވެ. ނަމަވެސް ޗަނާނާ ފާހަގަކުރެއްވި ގޮތުގައި، ޝީންއަށް މިހާރު ވަނީ ހަރަދުތައް ބޮޑުވުމާއި، ވާދަވެރިކަން އިތުރުވުމުގެ ގޮންޖެހުންތަކާ ކުރިމަތިވެފައެވެ.
ހޮންގްކޮންގްގައި ޝީން ލިސްޓުކޮށްފައި މިވަނީ، އެމެރިކާއާއި އިނގިރޭސިވިލާތުގެ މާކެޓުގައި ލިސްޓުކުރަން ކުރި މަސައްކަތް ނާކާމިޔާބުވެފައި ވަނިކޮށެވެ. އެމެރިކާގެ ގާނޫނުހަދާ މަޖިލީހުގެ މެންބަރުން ވަނީ ޝީންގެ ކާރުހާނާތަކުގައި މަޖުބޫރުން މަސައްކަތްކުރުވާ ކަމަށް ބުނެ، އެ ކުންފުނި ލިސްޓުކުރުމާ ދެކޮޅުހަދާފައެވެ. މި ތުހުމަތުތަކާ ގުޅިގެން ޝީން އިން ބުނެފައިވަނީ މަޖުބޫރުން މަސައްކަތްކުރުވުމަކީ އެ ކުންފުނިން އެއްވެސް ވަރަކަށް ޖާގަދޭނެ ކަމެއް ނޫން ކަމަށެވެ. މީގެ އިތުރުން، އެހެން ޑިޒައިނަރުންގެ ހިޔާލުތައް ކޮޕީކުރާ ކަމުގެ ތުހުމަތުވެސް އެ ކުންފުންޏަށް އަމާޒުވެފައިވެއެވެ. ދެހާސް އަށް ވަނަ އަހަރު ޗައިނާގައި އުފެއްދި މި ކުންފުނި، ލިސްޓުކުރުމަށްޓަކައި ޗައިނާ ކުންފުންޏެއްގެ ސިފަ ކުޑަކުރުމަށް ވަނީ ހެޑްކުއާޓަރު ސިންގަޕޫރަށް ބަދަލުކޮށްފައެވެ.
ޗައިނާގެ މާކެޓް ރިސާޗް ކުންފުނި ޗޯޒަންގެ ބާނީ އެޝްލީ ޑުޑަރެނޮކް ވިދާޅުވި ގޮތުގައި، ޝީން ލިސްޓުކުރާނެ އިތުރު މާކެޓެއް ނެތުމުން 2025 ވަނަ އަހަރު އެ ކުންފުނިން ވަނީ މިސްރާބު ހޮންގްކޮންގަށް ބަދަލުކޮށްފައެވެ. ގްލޯބަލްޑޭޓާގެ އެނަލިސްޓް ލުއީސް ޑެގްލީސް-ފާވްރޭ ފާހަގަކުރި ގޮތުގައި، ހުޅަނގުގެ މާކެޓުތަކުން ފުރުސަތު ބަންދުވަމުންދާ ޗައިނާގެ ކުންފުނިތަކަށް މިހާރު އޮތް ހަމައެކަނި މަގަކީ ހޮންގްކޮންގް މާކެޓެވެ. މި ބަދަލާއެކު، ޝީންގެ ބާނީ ޝޫ ޔަންގްޓިއަން ވަނީ ފެބްރުއަރީ މަހު ގުއާންޑޮންގްގައި ބޭއްވި ވިޔަފާރި ކޮންފަރެންސެއްގައި ބައިވެރިވެ، ޗައިނާއާއެކު އޮތް ގުޅުން އަލުން ކަށަވަރުކޮށްދީފައެވެ.
ޝީންއަށް މިހާރު ވަނީ ވިޔަފާރީގެ ގޮތުން ގިނަ ގޮންޖެހުންތަކަކާ ކުރިމަތިވެފައެވެ. އެމެރިކާއަށް އެތެރެކުރާ 800 ޑޮލަރަށް ވުރެ އަގުހެޔޮ ޕެކޭޖުތަކުން ޑިއުޓީ މާފުކުރާ ގަވާއިދު އުވާލުމާ ގުޅިގެން، ޖުލައި މަހު ޝީންއަށް ވަނީ 99 މިލިއަން ޑޮލަރުގެ ގެއްލުމަކާ ކުރިމަތިވެފައެވެ. ހަމައެއާއެކު، ވިލާތުގެ އިއްތިހާދުން ވަނީ އަގުހެޔޮކޮށް އެތެރެކުރާ މުދަލުން 3 ޔޫރޯގެ ޓެކްހެއް ނަގަން ފަށާފައެވެ. ޝީން އިން ބުނި ގޮތުގައި، އީރާނުގެ ހަނގުރާމައިގެ ސަބަބުން ޑިމާންޑް ދަށްވެ، ހަރަދުތައް ބޮޑުވެ، ބައެއް މާކެޓުތަކަށް މުދާ ފޯރުކޮށްދިނުމުގައި ވަނީ ލަސްތަކެއް ކުރިމަތިވެފައެވެ. ޝީންގެ ވާދަވެރި ޓެމޫގެ ވެރިފަރާތް ކަމަށްވާ ޕީޑީޑީއަށްވެސް އޮގަސްޓު މަހު ލިބުނު އާމްދަނީ ވަނީ ލަފާކުރި ވަރަށް ވުރެ ދަށްވެފައެވެ.
ޑުޑަރެނޮކް ވިދާޅުވި ގޮތުގައި، މީހުން އަދިވެސް ޝީންގެ މުދާ ގަންނަމުންދިޔަ ނަމަވެސް، ހަރަދުތައް ބޮޑުވުމުގެ ސަބަބުން ކުރިން ފައިދާ ނެރުނު ގޮތަށް މިހާރު ފައިދާއެއް ނުނެރެވެއެވެ. ލިސްޓުކޮށްފައިވާ ކުންފުންޏެއްގެ ގޮތުގައި، ގަވާއިދުތައް ހަރުކަށިވެ، ޓެރިފްތައް ބޮޑުވެފައިވާ ދުވަސްވަރެއްގައި ޝީންގެ ވިޔަފާރީގެ ފައިދާ ދެމެހެއްޓޭނެކަން އެ ކުންފުނިން ސާބިތުކޮށްދޭން ޖެހޭނެ ކަމަށް އޭނާ ފާހަގަކެއްވިއެވެ.