ކައުންސިލް އިންތިޚާބުގައި އެމީހަކު ދިރިއުޅޭ ރަށަށް ވޯޓު ލެވޭ ގޮތަށް އުސޫލުތައް ބަދަލުކުރުމަށްޓަކައި މަސައްކަތްކުރުމަށް އިދިކޮޅު މައި ޕާޓީ، މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ކޮންގްރެސްއަށް "ބޮޑުބަދަލު" ގެ ފަރާތުން ގަރާރެއް ހުށަހަޅަން ނިންމައިފިއެވެ.
އަންނަ މަހުގެ އެކަކުން ތިނަކަށް ބޭއްވުމަށް ހަމަޖެހިފައިވާ މި ކޮންގްރެސްއަށް މި ގަރާރު ހުށަހަޅުއްވަނީ އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއިލްއެވެ. މި ގަރާރަށް ތާއިދުކުރައްވާފައި ވަނީ ރައްޔިތުންގެ މަޖިލީހުގެ ކުރީގެ މެންބަރު އަދި އެ ޕާޓީގެ މެމްބަޝިޕް ކޮމިޓީގެ ކޯ-ޗެއާ އިލްޔާސް ލަބީބެވެ.
އެ ހުށަހެޅުމުގައި ބަޔާންކޮށްފައިވާ ގޮތުގައި، މިހާރު އޮންނަ އުސޫލުން އެމީހެއްގެ ދާއިމީ އެޑްރެސް އޮންނަ އިންތިޚާބީ ދާއިރާއަށް ވޯޓު ދިނުމުގެ ބަދަލުގައި، އެމީހަކު ދިރިއުޅޭ ދާއިރާއެއްގެ ކައުންސިލަށް ކުރިމަތިލާ ކެންޑިޑޭޓުންނަށް ވޯޓު ދިނުމުގެ ފުރުސަތު ހޯދައިދިނުމަށް ދިރާސާތައް ކުރަންޖެހެއެވެ. އަދި ލާމަރުކަޒީ ނިޒާމުގެ ހަގީގީ ފައިދާ ރައްޔިތުންނަށް ލިބޭނީ އެމީހަކު ހިދުމަތް ހޯދާ ކައުންސިލެއްގެ ކައުންސިލަރުން އިންތިހާބުކުރުމުގެ ފުރުސަތު ލިބިގެން ކަމަށް ވެސް އެ ގަރާރުގައި ފާހަގަކޮށްފައިވެއެވެ.
https://x.com/MDPSecretariat/status/2099367098082578544
އޭގެއިތުރުން، ރައްޔިތުންގެ މަޖިލީހަކީ ދެ ގޭގެ މައްޗަށް އެކުލެވޭ މުއައްސަސާއަކަށް ބަދަލުކުރުމަށްޓަކައި ދިރާސާތައް ކުރުމަށާއި، އޭގެ ތެރެއިން މަތި ގެއަކީ އެކިއެކި ފަންނުތަކުގެ މީހުން ހިމެނޭ ތަނެއްގެ ގޮތުގައި ހެދުމަށް މި ސިޔާސަތުގައި ވަނީ ހިމަނައިފައެވެ. އަދި ދައުލަތުގެ މަގާމުތަކަށް އިންތިހާބުކުރެވޭ މީހުން އެމީހުންގެ ދައުރުގެ ތެރޭގައި ވަކިކުރުމުގެ ފުރުސަތު ނުވަތަ ރީކޯލް ވޯޓަކަށް ދިއުމުގެ ފުރުސަތު ރައްޔިތުންނަށް ހޯދައިދިނުމަށް ވެސް ހުށަހަޅާފައިވެއެވެ.
އެމްޑީޕީން މިހާރު ވަނީ ކޮންގްރެސްއަށް ހުށަހެޅިފައިވާ ބޮޑުބަދަލު ސިޔާސަތު ކަރުދާހާއި، ލާމަރުކަޒީ ސިޔާސަތު ކަރުދާސް އަދި އަސާސީ ގަވާއިދުގެ އިސްލާހުތައް އާންމުކޮށްފައެވެ.
އަދި މި އިސްލާހުތަކާ ގުޅިގެން އިތުރު ބަދަލެއް ހުށަހަޅަން ބޭނުންވާ ފަރާތްތަކަށް މި މަހުގެ 20 ވަނަ ދުވަހުގެ މެންދުރު 12:00 އާ ހަމައަށް ފުރުސަތު ހުޅުވާލާފައިވާއިރު، އެކަމާ ގުޅޭ ފޯމުތައް ވެސް އެ ޕާޓީން ވަނީ ލިބޭނެ އިންތިޒާމު ހަމަޖައްސައިފައެވެ.