ކ. ހުރާގައި ރޭ ހިނގި ނުރައްކާތެރި އަލިފާނުގެ ހާދިސާ ހިނގަން މެދުވެރިވީ ޗާޖަށް ޖަހާފައި އޮތް މޯބައިލް ފޯނެއްގައި ރޯވެގެން ކަމަށް ލަފާކުރެވޭ ކަމަށް ހުރާ ކައުންސިލްގެ ރައީސް އީސާ އަހުމަދު ވިދާޅުވެއްޖެއެވެ.
މި ހާދިސާގައި މީހުން ދިރިއުޅޭ ގެއެއް ބޭނުން ނުކުރެވޭ ވަރަށް އަނދާފައިވާއިރު، އެ ގޭގައި ދިރިއުޅެމުންދިޔަ 15 މީހަކަށް ވަނީ ހާލުގައި ޖެހިގެން އެހީތެރިކަން ފޯރުކޮށްދީފައެވެ.
ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނި ގޮތުގައި، މި ހާދިސާގައި އެ ގޭގައި ދިރިއުޅޭ މީހެއްގެ އެއް އަތް ފިހިގެން ފަރުވާ ދީފައިވެއެވެ. ނަމަވެސް އޭނާއަށް ލިބުނު އަނިޔާގެ ތަފްސީލެއް އަދި އަލިފާން ރޯވާން ދިމާވި ސީދާ ސަބަބެއް އަދި އެއްވެސް ފަރާތަކުން ކަށަވަރުކޮށްދީފައެއް ނުވެއެވެ.
ހުރާ ކައުންސިލްގެ ރައީސް އީސާ އަހުމަދު "ސަން" އަށް މައުލޫމާތު ދެއްވަމުން ވިދާޅުވީ، އަލިފާން ހިފަން މެދުވެރިވި ސީދާ ސަބަބު އަދި ދެނެގަނެވިފައި ނުވި ނަމަވެސް، ބެލެވޭ ގޮތުގައި އަލިފާން ރޯވީ ކޮޓަރީގައި ޗާޖަށް ޖަހާފައި އޮތް މޯބައިލް ފޯނެއްގައި ރޯވެގެން ކަމަށެވެ.
"އަލިފާން ރޯވަން މެދުވެރިވީ ކޮޓަރީގައި ޗާޖަށް ޖަހާފައި އޮތް މޯބައިލް ފޯނެއްގައި ރޯވެގެން ކަމަށް ލަފާ ކުރެވޭ،" އީސާ ވިދާޅުވިއެވެ.
މި ހާދިސާގައި އަނިޔާވެފައިވަނީ އުމުރުން 28 އަހަރުގެ އަންހެނަކަށް ކަމަށާއި، އޭނާގެ އަތުގެ އިނގިލިތައް ފިހިފައިވާ ކަމަށް އީސާ މައުލޫމާތު ދެއްވިއެވެ. އަދި އެއީ އެ ގޭގައި ތިބި ދެ ކުދިންގެ މަންމަ ކަމަށްވެސް އޭނާ ވިދާޅުވިއެވެ.
އީސާ ވިދާޅުވި ގޮތުގައި އަލިފާން ރޯވީ މުޅި ގޭގައި ނޫން ކަމަށާއި، ރޯވީ ދެ ކޮޓަރި ހުންނަ އެ ގޭގެ އެއް ކޮޓަރީގައިކަމަށެވެ.
މި ހާދިސާ ހިނގުމާއެކު ގޭގައި ހިފާފައި ހުރި އަލިފާން ނިއްވާލާފައިވަނީ ރަށުގެ ރައްޔިތުން ނުކުމެ ކުރި މަސައްކަތުންކަމަށް ކައުންސިލް ރައީސް އީސަ ވިދާޅުވިއެވެ.
ކައުންސިލް ރައީސް އިތުރަށް ފާހަގަކުރެއްވި ގޮތުގައި، ރަށަށް ފުލުހުން ނާންނާތީ މި ހާދިސާ މުޅިން ހިނގާދިޔަ ގޮތުގެ ތަފްސީލީ ބަޔާނެއް މިވަގުތު ދެވެން ނެތް ކަމަށެވެ.
މިފަދަ ހާދިސާތަކުގައި ގެއްލުންވާ ފަރާތްތަކަށް ވަގުތީ ބޯހިޔާވަހިކަމާއި ޒަރޫރީ ބޭނުންތައް ފުއްދައިދިނުމަކީ އެންޑީއެމްއޭއިން އާންމުކޮށް ކުރަމުން އަންނަ ކަމެކެވެ. މި ހާދިސާގައި ލިބުނު މާލީ ގެއްލުމުގެ ތަފްސީލު ކަމާބެހޭ ފަރާތްތަކުން މިހާރު ދަނީ އިތުރަށް ބަލައި ވަޒަންކުރަމުންނެވެ.
މި ފަހަކަށް އައިސް އަނެއްކާ ވެސް ބޮޑެތި އަލިފާނުގެ ހާދިސާތައް ރާއްޖޭގެ އެކި ހިސާބުތަކުގައި ހިނގުން މިވަނީ އާއްމުވެފައެވެ.