މަސްތުވާތަކެތި ވިއްކާ ކަމަށް ތުހުމަތު ކުރެވޭ މީހަކު ހޮސްޕިޓަލުގައި އެޑްމިޓްކޮށްފައި އޮއްވައި، 15 ދުވަހަށް ބަންދު މުއްދަތު ޖަހައިފިއެވެ.
ހޮސްޕިޓަލުގައި އެޑްމިޓްކޮށްފައި އޮއްވާ 15 ދުވަހަށް ބަންދު މުއްދަތު ޖެހީ، ތ. މަޑިފުށީ ފިރިހެނަކަށެވެ.
އޭނާގެ ބަންދު އަމުރުގައި ފަނޑިޔާރު ފާހަގަކުރައްވައިފައިވާ ގޮތުގައި، ޣައިރު ހާޒިރުގައި ބަންދު މަޖިލިސް ކުރިއަށް ގެންދިޔައީ އެ މީހާ އެޑްމިޓްކޮށްފައި އޮތުމުންނެވެ. އަދި ހޮސްޕިޓަލުން ދޫކޮށްލުމާއެކު ވީ އެންމެ އަވަހަކަށް ފަނޑިޔާރެއްގެ ކުރިމައްޗަށް ހާޒިރު ކުރުމަށްވަނީ އަންގަވައިފައެވެ.
މި ފިރިހެން މީހާ ހައްޔަރުކޮށްފައިވަނީ އިޖުރާއަތުތަކާ އެއްގޮތަށް ކަމަށް ފަނޑީޔާރުވަނީ ކަނޑައަޅުއްވައިފައެވެ. އަދި މި މީހާއަކީ ކުށުގެ ރެކޯޑް އޮންނަ މީހެއްކަންވެސް ފަނޑިޔާރުވަނީ ފާހަގަކުރައްވާފައެވެ.
މީގެ އިތުރުން ރެކޯޑްތަކުން ދައްކާ ގޮތުގައި މި މީހާއަކީ މީގެ ކުރިން ހޯދާ ނުފެނިގެން ފޮޓޯއާއެކު ފުލުހުން އިއުލާންވެސް ކޮށްފައިވާ މީހެކެވެ.
ކުށެއްގެ ތުހުމަތުގައި ހައްޔަރުކުރެވޭ މީހަކު 24 ގަޑިއިރު ތެރޭގައި ފަނޑިޔާރެއްގެ ކުރިމައްޗަށް ހާޒިރުކުރަންވާނެ ކަމަށް ގާނޫނުއަސާސީގެ 48 ވަނަ މާއްދާގެ (ޣ) ގައި ބަޔާންކުރެއެވެ. ނަމަވެސް، ބައެއް ޙާލަތްތަކުގައި އެ މީހަކު ހާޒިރުނުކޮށް ބަންދާމެދު ގޮތެއް ނިންމުމުގެ އިޚްތިޔާރު ގާނޫނުން ފަނޑިޔާރަށް ލިބިދެއެވެ.
ޖިނާއީ އިޖުރާއަތުގެ ގާނޫނުގެ 60 ވަނަ މާއްދާގެ (ކ) ގައިވާ ގޮތުން، ބަލިހާލަތު ހުރިގޮތުން ކޯޓަށް ހާޒިރުކުރެވެން ނެތުމުން ޑޮކްޓަރެއްގެ ލިޔުން ހުށަހަޅާފައިވާ ނަމަ ޣައިރު ހާޒިރުގައި ބަންދު މަޖިލިސް ކުރިއަށް ގެންދެވިދާނެއެވެ. އަދި ބަންދު ކުރެވޭ މީހާގެ ސަލާމަތާއި ރައްކާތެރިކަމަށްޓަކައި ނުވަތަ އޭނާގެ ފަރާތުން އެހެން ބައެއްގެ ސަލާމަތަށް ނުރައްކާވެދާނެ ފަދަ ސަބަބެއް އޮތް ނަމަވެސް ޣައިރު ހާޒިރުގައި ބަންދު މަޖިލިސް ކުރިއަށް ގެންދެވިދާނެއެވެ.
މީހަކު ޣައިރު ހާޒިރުގައި ބަންދާމެދު ގޮތެއް ނިންމާއިރުވެސް، އޭނާގެ ފަރާތުން ގާނޫނީ ވަކީލަކަށް ބަންދު މަޖިލީހުގައި ބައިވެރިވުމުގެ ފުރުޞަތު އޮންނަންވާނެއެވެ. އަދި ފަނޑިޔާރު ޣައިރު ހާޒިރުގައި ބަންދާމެދު ގޮތެއް ނިންމާއިރު، އޭނާ ބަންދުގައި ބަހައްޓަންޖެހޭ ސަބަބުތައް ތަހުގީގީ އިދާރާއިން ހުށަހަޅަންޖެހޭނެއެވެ. އަދި އޭނާ ބަލިވެގެން ހާޒިރު ނުކުރެވުނު ނަމަ، އެ ބަލިމަޑުކަމެއް ފިލައިގެން ދަންދެން ނުވަތަ ކަނޑައެޅޭ ވަކި މުއްދަތަކަށް ބަންދު އިތުރުކުރެވިދާނެއެވެ.
ޣައިރު ހާޒިރުގައި ބަންދު އިތުރުކުރި ސަބަބު ފިލައިދިއުމުން (މިސާލަކަށް ބަލި ފަސޭހަވުމުން)، އެންމެ އަވަސް ފުރުޞަތެއްގައި އޭނާ ފަނޑިޔާރެއްގެ ކުރިމައްޗަށް ހާޒިރުކުރަންޖެހޭނެއެވެ.