ސައުތު އޭޝިއަން ޖޫޖިޓްސޫ ޗެމްޕިއަންޝިޕް 2026 ގައި ވާދަކުރުމަށް ރާއްޖޭގެ ވަރުގަދަ ޓީމެއް ތައްޔާރުވެއްޖެއެެވެ.
ސްރީލަންކާގެ ދިގަނާގައި ކުރިއަށްދާ މި މުބާރާތުގައި ރާއްޖޭގެ އިތުރުން ސަރަހައްދީ ގޮތުން ފާހަގަކޮށްލެވޭ އިންޑިއާ، ޕާކިސްތާން، އަފްޣާނިސްތާން، އަދި ބަންގްލަދޭޝްއިން ވާދަކުރާނެއެވެ. މި ފަހަރުގެ މުބާރާތުގައި ރާއްޖެ ތަމްސީލުކުރުމަށް އަށް އެތުލީޓުން ހިމެނޭ ޓީމެއް ވަނީ ކަނޑައަޅާފައެވެ.
ރާއްޖޭގެ އެތުލީޓުން މިފަހަރު ވާދަކުރާ ކެޓަގަރީތަކުގެ ތެރޭގައި ބްރެޒިލިއަން ޖިޖުޓްސޭ (ބީޖޭޖޭ) ހިމެނެއެވެ.
މި ޓީމުގައި ހިމެނޭ އެތުލީޓުންނަކީ އަހުމަދު ސިނާން (ފައިޓިންގ އަދި ބީ.ޖޭ.ޖޭ - 77 ކިލޯގްރާމް، ހުސައިން ސަޚާއު (ބީ.ޖޭ.ޖޭ -85 ކިލޯގްރާމް)، މުހައްމަދު ޝާން ހަސަން (ފައިޓިންގ އަދި ބީ.ޖޭ.ޖޭ -69 ކިލޯގްރާމް)، އައިވާ ޒުލާލް ޒައީމް (ފައިޓިންގ، 70 ކިލޯގްރާމް )، ޔަލްމައީ ބާސިތު (18 އަހަރުން ދަށް، ފައިޓިންގ އަދި ބީ.ޖޭ.ޖޭ -57 ކިލޯގްރާމް) އެވެ.
މީގެ އިތުރުން އައިދިން މުހައްމަދު ޝަމްސު (18 އަހަރުން ދަށް، ފައިޓިންގ އަދި ބީޖޭޖޭ (99 ކިލޯގްރާމް)، އީސާން މުހައްމަދު (ފައިޓިންގ އަދި ބީ.ޖޭ.ޖޭ 94 ކިލޯގްރާމް)، އަދި މަރިޔަމް އައިނީ (18 އަހަރުން ދަށް، ފައިޓިންގ އަދި ބީ.ޖޭ.ޖޭ -52 ކިލޯގްރާމް) އެވެ.
މި މުބާރާތަކީ ދެކުނު އޭޝިއާގެ އެކި ގައުމުތަކުގެ މެދުގައި ޖޫޖިޓްސޫގެ ފެންވަރު ވަޒަންކޮށް، ކުޅުންތެރިންގެ ހުނަރު އިތުރަށް ތަރައްގީކުރުމަށް ލިބޭ ރަނގަޅު ފުރުސަތެކެވެ.
ރާއްޖޭގެ އެތުލީޓުން މިހާރު ދަނީ މުބާރާތުގައި ރަނގަޅު ނަތީޖާއެއް ހޯދުމަށްޓަކައި އެންމެ ފަހުގެ ތަމްރީނުތައް ފުރިހަމަކުރަމުންނެވެ. މިފަދަ ބައިނަލްއަގުވާމީ މައިދާންތަކުގައި ދިވެހި ކުޅުންތެރިން ބައިވެރިވުމަކީ ރާއްޖޭގެ މާޝަލް އާޓްސް އާއި ޖޫޖިޓްސޫގެ ކުރިމަގަށް ލިބޭ ވަރަށް ބޮޑު ކުރިއެރުމެކެވެ.