ކްލަބް އީގަލްސް އާއި ބްލޫ ސްޕޯޓްސް ކުލަބު ބައްދަލުކުރާ މެޗާއެކު މިއަހަރުގެ އެފްއޭ ކަޕް ހުކުރުދުވަހުގެ ހަވީރު ފަށަން ތައްޔާރުވެއްޖެއެވެ.
ދިވެހިރާއްޖޭގެ ފުޓުބޯޅައިގެ އެންމެ ޝަރަފުވެރި މުބާރާތްތަކުގެ ތެރޭގައި ހިމެނޭ އެފްއޭ ކަޕްގެ ތާވަލު މިހާރު އާންމުކޮށްފައިވާއިރު، މުބާރާތް ފެށުމަށް ހަމަޖެހިފައިވަނީ މި މެޗުންނެވެ.
ކްލަބް އީގަލްސް އަދި ބްލޫ އެސްސީގެ މެޗަށްފަހު، ހަމަ އެރޭ 21:00 ގައި ގައުމީ ދަނޑުގައި ކުޅުމަށް ތާވަލުކުރެވިފައިވާ ދެވަނަ މެޗުގައި ބައްދަލުކުރާނީ އޮޑީ އެސްސީ އާއި ނިއު ރޭޑިއަންޓް ސްޕޯޓްސް ކްލަބެވެ.
ފުރަތަމަ ބުރުގެ ދެވަނަ މެޗުޑޭގެ ކުޅުން ކުރިއަށްދާނީ ޖެހިގެން އަންނަ ހޮނިހިރު ދުވަހުގައެވެ. އެ ދުވަހުގެ ހަވީރު 16:00 ގައި ބައްދަލުކުރާނީ ވިކްޓަރީ ސްޕޯޓްސް ކްލަބާއި ޓީސީ ސްޕޯޓްސް ކުލަބެވެ.
އެއަށްފަހު އެރޭ ކުޅޭ މެޗުގައި ބައްދަލުކުރާނީ ބުރު ސްޕޯޓްސް ކްލަބާއި މާޒިޔާ ސްޕޯޓްސް އެންޑް ރެކްރިއޭޝަން އެވެ. މި ހުރިހާ މެޗެއްވެސް ކުޅުމަށް ހަމަޖެހިފައިވަނީ ރާއްޖޭގެ ގައުމީ ފުޓުބޯޅަ ދަނޑުގައެވެ. މި މެޗުތަކަކީ މުބާރާތުގެ ކުރިއަށް އޮތް ބުރުތަކަށް ޓީމުތައް ދަތުރުކުރުމަށް ކުޅެވޭ ނޮކްއައުޓް މެޗުތަކެކެވެ.
ފުރަތަމަ ބުރުގެ މެޗުތަކަށްފަހު، ދެން ކުޅުމަށް ހަމަޖެހިފައިވަނީ ސެމީ ފައިނަލް މެޗުތަކެވެ. ސެމީ ފައިނަލް މެޗުތައް ކުޅުމަށް ހަމަޖެހިފައިވަނީ 15 އޭޕްރީލް ވާ ބުދަ ދުވަހުއެވެ.
ފައިނަލް މެޗު ކުޅުމަށް ތާވަލުކުރެވިފައިވަނީ 18 އޭޕްރީލް 2026 ވާ ހޮނިހިރު ދުވަހުއެވެ. މުބާރާތުގެ ފޯމެޓް ރޭވިފައިވާ ގޮތުން، އެ ދުވަހުގެ ހަވީރު 16:00 ގައި ތިންވަނަ ހޮވުމަށް ކުޅޭ މެޗުގައި ބައްދަލުކުރާނީ 15 އޭޕްރީލްގައި ކުޅެވުނު ސެމީ ފައިނަލް މެޗުތަކުން ބަލިވާ ދެ ޓީމެވެ. އަދި ފައިނަލް މެޗު ކުޅުމަށް ހަމަޖެހިފައިވަނީ އެރޭ 21:00 ގައެވެ.