ފުވައްމުލަކު ސިޓީގައި ޖެންސެޓަކަށް ދިމާވި މައްސަލައަކާ ގުޅިގެން، އެކި ސަރަހައްދުތަކުގައި، އެކި ގަޑިތަކުގައި ކަރަންޓު ކަނޑަން ނިންމައިފައިވާކަން މިއަދު އިއުލާންކޮށްފިއެވެ.
ފެނަކައިގެ ފުވައްމުލަކު ބްރާންޗުން ނެރުނު އިއުލާނެއްގައި ވަނީ، އެ ސިޓީގެ ޖެންސެޓަކަށް ދިމާވި މައްސަލައެއް ހައްލު ކުރެވެންދެން ތާވަލާ އެއްގޮތަށް ކަރަންޓުގެ ޚިދުމަތް ކަނޑާނެ ކަމަށެވެ. ނަމަވެސް ލޯޑު މަތިނުވާ ގަޑިތަކުގައި ބައެއް ސަރަހައްދުތަކުން ކަރަންޓު ނުކެނޑުމަކީ އެކަށީގެންވާ ކަމެއް ކަމަށް އެ ކުންފުނިން ބުނެފައިވެއެވެ.
އެ ކުންފުނިން ވަނީ، މިއަދު 18:00އިން ފެށިގެން ކޮންމެ ގަޑިއިރެއްގައި ކަރަންޓު ކެނޑޭނެ ކަމަށް ބެލެވޭ ސަރަހައްދުތަކުގެ ތާވަލެއް އިއުލާނުގައި ހިމަނައިފައެވެ. އެގޮތުން 00:00އާ ހަމައަށް ކަރަންޓު ކަނޑަމުންދާނެ ކަމަށް ބުނެފައިވެއެވެ.
ފެނަކައިން ވަނީ ކަރަންޓު ކެނޑުމުން، އިލެކްޓްރޯނިކް ތަކެތީގެ ސްވިޗު އޮފްކޮށްފައި ބެހެއްޓުމަކީ ރައްކާތެރި ކަމެއް ކަމަށް ބުނެފައެވެ.
އެ ކުންފުނިން ވަނީ، އިތުރު މައުލޫމާތު ބޭނުންވާނަމަ 3035644އަށް ނުވަތަ 7302296އަށް ގުޅުމުން ލިބޭނެ ކަމަށް ބުނެފައެވެ.
ފުވައްމުލަކުގެ މޭޔަރު އިސްމާއީލް ރަފީގް "ސަން"އަށް ވިދާޅުވީ މީގެ ގާތްގަނޑަކަށް ދެ ހަފުތާ ކުރިން ވެސް، ދެ ދުވަހެއްގައި ލޯޑު ބޮޑުވެގެން ކަރަންޓު ކެނޑިފައިވާ ކަމަށެވެ. މިހާރު، އެކި ގަޑިތަކުގައި ކަރަންޓު ކަނޑާލަން އުޅޭކަމުގެ މައުލޫމާތު ލިބުނީ މިއަދު ކަމަށާއި، ޖެންސެޓެއްގައި މައްސަލަ ޖެހިގެން އުޅޭކަން ވެސް އެނގުނީ މިއަދު ކަމަށް މޭޔަރު ވިދާޅުވިއެވެ.
މީގެ އިތުރުން، ކަރަންޓު ކަނޑަމުންދާނެ މުއްދަތު މިހާތަނަށް އެނގިފައިނުވާ ކަމަށް ރަފީގް ވިދާޅުވިއެވެ.
ފާހަގަކޮށްލެވޭ ގޮތުގައި، މިއަދު މާލޭގެ މާފަންނުގެ ބައެއް ސަރަހައްދުތަކުން ވެސް ކަރަންޓު ކެނޑިފައިވެއެވެ. ނަމަވެސް ފަހުން އެ މައްސަލަ ވަނީ ހައްލުކޮށްފައެވެ.
ތޭރަ ހާހަށް ވުރެ ބޮޑު އާބާދީއެއް އޮންނަ ފުވައްމުލަކުގައި ޖެންސެޓެއްގައި މައްސަލަ ޖެހި، އެކި ގަޑިތަކުގައި ކަރަންޓު ކަނޑަން ނިންމައިފައިވާއިރު، ކައިރީ އޮންނަ އައްޑޫ ސިޓީގައި ވެސް ކަރަންޓު ކެނޑުމުގެ މައްސަލަ ވަނީ ވަރަށް ބޮޑުވެފައެވެ.
އެ ދެ ސިޓީއަށް ވެސް ކަރަންޓު ފޯރުކޮށްދެނީ ފެނަކައިން ކަމަށްވާއިރު، އެ ކުންފުންޏަކީ ކޮރަޕްޝަނުގެ ގިނަ ތުހުމަތުތައް އަމާޒުވެ، ސިޔާސީ ނުފޫޒުގެ ސަބަބުން ކުންފުނީގެ ހިންގުމުގެ ހަރުދަނާކަމާ ގުޅޭ ގޮތުން އަބަދުވެސް ކަންބޮޑުވުން އޮންނަ ކުންފުންޏެކެވެ.
މީގެ އިތުރުން މިއީ، މެދުއިރުމަތީގައި ހިނގަމުންދާ ހަނގުރާމައިގެ ސަބަބުން ތެލުގެ އަގު އުފުލި، ކަރަންޓުގެ އަގު ބޮޑުވުމުގެ ކަންބޮޑުވުން އުފެދިފައިވާ ދަނޑިވަޅެކެވެ. ރާއްޖޭން އިމްޕޯޓްތަކަށް ކުރާ ޚަރަދުގެ އެންމެ ބޮޑު ބައެއް ހޭދަކުރަނީ ތެލަށް ކަމަށްވާއިރު، ދައުލަތުގެ ޚަރަދު ކުޑަކުރަން، ބައެއް ގަޑިތަކުގައި ކަރަންޓު ކެނޑުމަށް ވެސް ކަމާ ގުޅޭ ބައެއް ފަރާތްތަކުން ލަފާދީފައިވެއެވެ.