ތުރުކީން 24 އަހަރުގެ ދިގު އިންތިޒާރަކަށްފަހު ފީފާ ވޯލްޑް ކަޕް ފުޓްބޯޅަ މުބާރާތުން ޖާގަ ހޯދައި، އެ ގައުމުގެ ފުޓްބޯޅައިގެ އާ ތާރީޚެއް ލިޔެފިއެވެ.
ޔޫރަޕް ސަރަހައްދުގެ އެންމެ ފަހު ހަތަރު ޖާގަ ކަށަވަރުކުރުމަށް ކުޅުނު ފޯރިގަދަ ޕްލޭއޯފް މެޗުގައި ކޮސޯވޯއާ ވާދަކޮށް ތުރުކީން ކުރިހޯދީ 1-0 ގެ ނަތީޖާއަކުންނެވެ.
މި މެޗުގެ ހަމައެކަނި ލަނޑު މެޗުގެ 53 ވަނަ މިނިޓުގައި ކާމިޔާބުކޮށްދިނީ ފެނަބާޗޭގެ ތަރި ކަރީމް އަޓާކިގްލޫއެވެ. މިއީ 2002 ވަނަ އަހަރުގެ ވޯލްޑް ކަޕްގައި ހަތަރުވަނަ ހޯދި ފަހުން، ދުނިޔޭގެ އެންމެ ޝަރަފުވެރި މުބާރާތުން ތުރުކީއަށް ޖާގަ ލިބުނު ފުރަތަމަ ފަހަރެވެ.
އަންނަ ޖޫން މަހުގެ 11 ވަނަ ދުވަހު އެމެރިކާ، މެކްސިކޯ އަދި ކެނެޑާގައި ބޭއްވުމަށް ހަމަޖެހިފައިވާ މި މުބާރާތުގައި ތުރުކީ ހިމެނިފައިވަނީ އޮސްޓްރޭލިޔާ، އެމެރިކާ އަދި ޕެރަގުއޭއާއެކު ގްރޫޕް ސީގައެވެ.
އެމެރިކާގައި ބާއްވާ ވޯލްޑްކަޕަށް ކޮލިފައިވުމާއެކު ތުރުކީގެ ކުޅުންތެރިން އުފާފާޅޫކުރަނީ--
ކޮލިފައިންގައި ތުރުކީން މޮޅު ކުޅުމެއް ދެއްކި ނަމަވެސް، އެ ގައުމަށް ސީދާ ޖާގައެއް ނުލިބުނީ ސްޕޭނަށްވުރެ ތިން ޕޮއިންޓް މަދުވެ ގްރޫޕުގެ ދެވަނައަށް ދިއުމުންނެވެ.
މި ނަތީޖާއާއެކު ކޮސޯވޯގެ ވޯލްޑް ކަޕް ހުވަފެންތަކަށް ހުރަސް އެޅުނުއިރު، ޔޫރަޕްގެ ޕްލޭއޯފްގެ ތެރެއިން މުބާރާތަށް ދެން ހޮވުނީ ސްވިޑްން، ޗެކް ރިޕަބްލިކް އަދި ބޮސްނިއާއެވެ. ސްވިޑްންއިން ޕޮލެންޑް 3-2 އިން ބަލިކުރުމާއެކު، ބާސެލޯނާގެ މަޝްހޫރު ފޯވަޑް ރޮބަޓް ލެވަންޑޯސްކީ މި ފަހަރުގެ ވޯލްޑް ކަޕުން ނުފެންނާނެކަން ވަނީ ކަށަވަރުވެފައެވެ.
ތުރުކީން ޖާގަ ހޯދީ ޑެންމާކްގެ މައްޗަށް 3-1 އިން ކުރިހޯދައިގެން ކަމަށްވާއިރު، މި ފަހަރުގެ އެންމެ ބޮޑު ސިއްސުމަކީ ވަރުގަދަ އިޓަލީ ޕެނަލްޓީ ޖަހައިގެން 4-1 އިން ބަލިކޮށް، ބޮސްނިއާއިން މުބާރާތުގެ ޖާގައެއް ކަށަވަރުކުރުމެވެ. މިއީ އިޓަލީއަށް ވޯލްޑް ކަޕުން ޖާގަ ނުލިބި ބޭރުވާން ޖެހުނު ހިތްދަތި ފަހަރެކެވެ.