ހަކުރުން ދޭ ސަބްސިޑީ ކަނޑާލުމަށާއި، ގިނަ ދިވެހީންގެ ތެރޭގައި މަގުބޫލު ޝީޝާ މަނާކުރުމުގެ ވިސްނުމެއް ސަރުކާރުގެ ނެތް ކަމަށް، ރައީސް ޑރ. މުޙައްމަދު މުޢިއްޒު މިރޭ ވިދާޅުވެއްޖެއެވެ.
ރައީސް މިހެން ވިދާޅުވީ، ޝީޝާއާއި ހަކުރު އެކުލެވޭ ބުއިންތަކާ ގުޅޭ މަޝްވަރާތައް ސަރުކާރުން އެކި ފަންތީގައި ކުރަމުން އަންނަ ކަމަށް ހެލްތު މިނިސްޓަރު ޢަބްދުالله ނާޒިމް އިބްރާހީމް މިދިޔަ ބުރާސްފަތި ދުވަހު ވިދާޅުވެފައި ވަނިކޮށެވެ.
"އެއީ ވަރަށް މަލްޓިސެކްޓޯރަލްކޮށް ނަގަން ޖެހޭ ޑިޒިޝަންއެއް، މަލްޓިސެކްޓޯރަލް ލެވެލްގައި މަޝްވަރާކުރެވި، އެއަށް ފިޔަވަޅު އެޅޭނެ ދުވަހެއް އެއީ އަޅުގަނޑުމެން އިންތިޒާރު ކުރާ ދުވަހެއް ހެލްތު ސެކްޓާއިން، ނަމަވެސް މީގެ އެންމެ މުހިންމު ކަމަކީ ރައްޔިތުންގެ ހޭލުންތެރިކަން،" ބުރާސްފަތި ދުވަހު އޮތް ނޫސްވެރިންގެ ބައްދަލުވުމުގައި ނާޒިމް ވިދާޅުވިއެވެ.
އެކަމަކު، ވެރިކަންކުރާ ޕީއެންސީން އައްޑުއަށް ކަނޑައަޅާފައިވާ މެނިފެސްޓޯ "ދަ ގްރޭޓާ އައްޑޫ" ލޯންޗުކުރުމަށް ހެންވޭރު އާޓިފިޝަލް ބީޗުގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ، ޝީޝާ ބުއިން މަނާކޮށް ހަކުރުގެ ސަބްސިޑީ ކަނޑާލުމުގެ ވިސްނުމެއް ސަރުކާރުން ނުގެންގުޅޭ ކަމަށެވެ.
"އެހެން ނަމަވެސް ޕަބްލިކް އެވެއަނެސް އިތުރުކޮށް، މިކަންކަމުން ދުރުހެލިވުމަށް ބާރުއަޅައި ހިތްވަރުދޭން އަޅުގަނޑުމެން ބޭނުންވަނީ،" ރައީސް ވިދާޅުވިއެވެ.
އެމަނިކުފާނު ވިދާޅުވީ، ގިނަ ރައްޔިތުން އާދަވެފައިވާ ކަމެއް މަނާކުރުމަކުން އެކަމަކުން ރައްޔިތުން ދުރުނުކުރެވޭނެ ކަމަށެވެ. އޭގެ ބަދަލުގައި ހަކުރު ގިނަ ބުއިންތަކާއި ޝީޝާއިން ރައްޔިތުން ދުރުހެލިކުރުވަން ބާރުއަޅައި މަސައްކަތްކުރާނީ ކަމުގައި ރައީސް ވިދާޅުވިއެވެ.
އެއާއެކު، ސިއްހަތަށް ފައިދާހުރި ކާބޯތަކެތި ކަމަށްވާ މޭވާއާއި ތަރުކާރީ އުފެއްދޭނެ ގޮތާއި އަގުހެޔޮކޮށް އެ ތަކެތި ލިބޭނެ ގޮތް ހެދުމަކީ މި ސަރުކާރުން ތަންފީޒުކުރާނެ ސިޔާސަތުކަމަށްވެސް ރައީސް ވިދާޅުވިއެވެ.
ފާހަގަކުރެވޭ ގޮތުގައި މި ސަރުކާރުން ދުންފަތާ ދެކޮޅަށް ކުރަމުންދާ މަސައްކަތްތަކުގެ ދަށުން 2024ގައި ވަނީ ވޭޕް މަނާކޮށް، ސިނގިރޭޓުން ނަގާ ޓެކްސް ބޮޑުކޮށްފައެވެ. އަދި 2007އިން ފެށިގެން އުފަންވެފައިވާ އަދި އެ ތާރީޚުގެ ފަހުން އުފަންވާ ހުރިހާ ކުދިންނަށް ދުންފަތް މަނާ ކުރުމުގެ ގާނޫނު މިދިޔަ ނޮވެންބަރު މަހު ވަނީ ތަންފީޒު ކުރަން ފަށައިފައެވެ.
އެ ފިޔަަވަޅުތަކަށް ތައުރީފުކޮށް، ދިވެހި ޑޮކްޓަރުން ހިމެނޭ މޯލްޑިވިއަން މެޑިކަލް އެސޯސިއޭޝަން (އެމްއެމްއޭ)އިން މިދިޔަ އޮކްޓޫބަރު މަހު ނެރުނު ބަޔާނެއްގައި ވަނީ، ހަކުރު އެކުލެވޭ ބުއިންތަކާ ޕާމް އޮއިލްއާއި ޓްރާންސް ފެޓް ގިނައިން ހުންނަ ކާބޯތަކެއްޗާއި ޕްރޮސެސްކޮށްފައިވާ މަސް ފަދަ އުފެއްދުންތަކުން ނަގާ ޓެކްސް ބޮޑުކުރަން ގޮވާލައިފައެވެ. އަދި އެކި ފްލޭވާތަކުގެ ދުންފަތް އެކުލެވޭ ބާވަތްތަކާއި ޝީޝާ އެއްކޮށް މަނާކުރަން އެ ޖަމިއްޔާއިން ގޮވާލިއެވެ.
ރާއްޖޭގައި ޒުވާނުން ހިމެނޭ ގޮތަށް، ދުންފަތުގެ ބާވަތްތަކާއި ޝީޝާ ބޭނުންކުރުން ވެސް ވަރަށް އާންމެވެ.
މެޑިކަލް އެސޯސިއޭޝަނުން ވަނީ، އެ ޖަމިއްޔާއިން ގޮވާލައިފައިވާ ބަދަލުތައް ގެނައުމުން، ގައިންގަޔަށް ނާރާ ބަލިތަކާއި ދުންފަތުގެ އިސްތިއުމާލުކުރުމާ ގުޅުންހުރި ބަލިތަކުން ރައްކާތެރިވެ، ދުޅަހެޔޮ ގައުމަކަށް ވުމަށް މަގުފަހިވާނެ ކަމަށް ބުނެފައެވެ.
ސަރުކާރުގެ ކުންފުނި އެސްޓީއޯ މެދުވެރިކޮށް، ހަކުރު ހިމެނޭ ގޮތަށް، ކާޑުގެ ބާވަތްތަކުގެ އަގު އޮންނަނީ ކޮންޓްރޯލްކޮށްފައެވެ. އަދި ކާޑުގެ ބާވަތްތަކުން ސަބްސިޑީ ދިނުމަށް ކޮންމެ އަހަރަކު ވެސް މިލިއަނުން ޚަރަދުކުރެއެވެ.