ފިލްމު "މަހާރާޖް"އިން ބޮލީވުޑަށް ތައާރަފުވި ޒުވާން އެކްޓަރު ޖުނައިދު ޚާންގެ ކެރިއަރުގެ ހަތަރުވަނަ ފިލްމަށް ތައްޔާރުވަމުން އަންނަ ކަމަށް ރިޕޯޓުތަކުން ބުނެފިއެވެ.
މި ފިލްމަކީ މަޝްހޫރު ޕްރޮޑިއުސަރު އެކްތާ ކަޕޫރުގެ ބާލަޖީއަށް ޝަޝާންކް ގޯޝް ޑައިރެކްޓްކުރަން ހަމަޖެހިފައިވާ ފިލްމެކެވެ. "ރާގިނީ 3"ގެ ނަމުގައި އުފައްދާ މި ފިލްމުން ޖުނައިދުއާ އެކު ބަތަލާގެ ރޯލުން ފެންނާނީ ސައުތު ސިނަމާގެ އިތުރުން ބޮލީވުޑްގެ ފިލްމުތަކުން ވެސް ފެންނަ ތަރި ތަމަންނާ ބާޓިއާއެވެ.
މި ފިލްމުގެ ޑައިރެކްޓަރު ޝަޝާންކްއަކީ 2018 ވަނަ އަހަރުގެ ކާމިޔާބު ފިލްމު "ވީރޭ ދި ވެޑިން" އަދި ކާތިކް އާރްޔަންގެ ފިލްމު "ފްރެޑީ"ގެ ވެސް ޑައިރެކްޓަރެވެ.
ބިރުވެރި ހާދިސާތަކެއްގެ މައްޗަށް ބިނާކޮށް އުފައްދާ "ރާގިނީ 3"ގެ މަސައްކަތް ވަރަށް އަވަހަށް ފަށަން ތައްޔާރުވަމުން އަންނައިރު ތަމަންނާ އަންނަނީ ޕްރޮޑިއުސަރު އެކްތާ ކަޕޫރުގެ އިތުރު ފިލްމެއްގައި ވެސް މަސައްކަތް ކުރަމުންނެވެ. އެއީ ސިދާތް މަލްހޯތުރާއާ އެކު ކުޅޭ ފިލްމު "ވަން"އެވެ. މި ފިލްމަކީ ވެސް ބިރުވެރި ހާދިސާތަކެއްގެ މައްޗަށް ބިނާކޮށް އުފައްދާ ފިލްމެކެވެ.
ފިލްމު "އޭކް ދިން"ގެ މަންޒަރެއްގައި ޖުނައިދު އާއި ސައީ--ފޮޓޯ/ފިލްމުފެއަ
ބޮލީވުޑްގެ އެކްޓަރު އާމިރު ޚާންގެ ދަރިފުޅު ޖުނައިދު ޚާން އެންމެ އަވަހަށް ބެލުންތެރިންނަށް ފެންނާނީ މި އަހަރުގެ މެއި މަހު ރިލީޒްކުރާ ފިލްމު "އޭކް ދިން"އިނެވެ.
އާމިރުގެ އަމިއްލަ ޕްރޮޑަކްޝަން ކުންފުނިން ގެނެސްދޭ މި ފިލްމުގެ ބަތަލާ އަކީ ވެސް ސައުތު ސިނަމާގެ ފިލްމީ ތަރިއެކެވެ. ވަރަށް ރީތި ލޯބީގެ ވާހަކައެއްގެ މައްޗަށް ބިނާކޮށް އުފައްދާ މި ފިލްމުގައި ޖުނައިދުއާ އެކު ބަތަލާގެ ރޯލް ކުޅޭނީ ސައީ ޕައްލަވީއެވެ.