އިންސާނުން ޖައްވުގައި ދިގު މުއްދަތަށް ދަތުރުކުރަން ފެށުމާއެކު، އެމީހުންގެ ސިއްޙަތު ރައްކާތެރިކުރުމަކީ ބޮޑު ގޮންޖެހުމަކަށް ވެފައިވާއިރު، މިކަމަށް ޙައްލެއް ހޯދުމުގެ ގޮތުން އެމެރިކާގެ ޖައްވީ އިދާރާ ނާސާ އާއި ޓެކްނޮލޮޖީ މައިކުންފުނި ގޫގުލް ގުޅިގެން އާޓިފިޝަލް އިންޓެލިޖެންސް (އޭއައި) ޑޮކްޓަރެއް ތައްޔާރުކުރަން ފަށައިފިއެވެ.
މިކަމުގެ މައިގަނޑު މަޤްސަދަކީ، ހަނދާއި މާސް ފަދަ ދުރު ހިސާބުތަކަށް ކުރާ ދަތުރުތަކުގައި، ދުނިޔެއާ ގުޅުން ކެނޑިފައިވާ ޙާލަތްތަކުގައި އެސްޓްރޮނޯޓުންނަށް ބޭނުންވާ ސިއްޙީ އެހީތެރިކަން ފޯރުކޮށްދިނުމެވެ.
"ކްރޫ މެޑިކަލް އޮފިސަރު ޑިޖިޓަލް އެސިސްޓެންޓް" ގެ ނަން ދީފައިވާ މި އޭއައި އުފެއްދުމަކީ، ޑޮކްޓަރަކު ނެތް ޙާލަތެއްގައި ނުވަތަ ދުނިޔެއާ މުއާސަލާތު ކުރުން މެދުކެނޑިފައިވާ ވަގުތެއްގައި، އެސްޓްރޮނޯޓުންނަށް ޖެހޭ ބަލީގެ އަލާމާތްތައް ދެނެގަނެ، ފަރުވާ ކުރުމުގައި އެހީތެރިވުމަށް ފަރުމާކޮށްފައިވާ ޕްރޮގްރާމެކެވެ. މި ޕްރޮގްރާމް މަސައްކަތްކުރަނީ ގޫގުލް ކްލައުޑްގެ "ވާޓެކްސް އޭއައި" ޕްލެޓްފޯމްގައެވެ.
މި އުފެއްދުން ތަރައްޤީ ކުރުމުގެ ފުރަތަމަ މަރުޙަލާގައި، ތިން ޙާލަތެއްގައި ވަނީ ޓެސްޓްކޮށްފައެވެ. އެއީ، ފައިތިލައަށް ލިބޭ އަނިޔާއެއް، އަރިކަށީގައި ރިއްސުން، އަދި ކަންފަތުގައި ރިއްސުމެވެ. އެކަކު އެސްޓްރޮނޯޓަކު ހިމެނޭ ގޮތަށް ތިން ޑޮކްޓަރުން ހިމެނޭ ޓީމަކުން ވަނީ މި ޓެސްޓްތަކުގެ ނަތީޖާ ވަޒަންކޮށްފައެވެ.
ޓެސްޓްތަކުގެ ނަތީޖާތަކުން ފެނިގެންދިޔައީ މި އުފެއްދުމުން ބަލި ދެނެގަތުމުގައި ވަރަށް މަތީ ފެންވަރެއް ދައްކާފައިވާ ކަމެވެ. އެގޮތުން، ފައިތިލައިގެ އަނިޔާ 88 އިންސައްތަ، ކަންފަތުގައި ރިއްސުން 80 އިންސައްތަ، އަދި އަރިކަށީގައި ރިއްސުން 74 އިންސައްތަ ރަނގަޅުކަމަށް ފާހަގަކުރެވިފައިވެއެވެ.
ނާސާއިން ބުނާ ގޮތުގައި، މިއީ އަދި ފެށުމެއް ކަމަށްވާއިރު، ކުރިމަގުގައި މެޑިކަލް އާލާތްތަކުން ލިބޭ ޑޭޓާ ފަދަ އިތުރު މަޢުލޫމާތުތައް މި ޕްރޮގްރާމަށް އިތުރުކުރާނެއެވެ. އަދި އެސްޓްރޮނޯޓުންގެ ޚާއްސަ ޙާލަތްތަކަށް، މިސާލަކަށް މައިކްރޯގްރެވިޓީއަށް، މި އުފެއްދުން ހޭލުންތެރިކުރުވުމުގެ މަސައްކަތް ވެސް ކުރާނެއެވެ.
ގޫގުލްއިން ބުނި ގޮތުގައި، މި އުފެއްދުމުގެ ސަބަބުން އެސްޓްރޮނޯޓުންގެ ސިއްޙަތު ރައްކާތެރިވެގެން ދިއުމުގެ އިތުރުން، މިކަމުން ލިބޭ ފިލާވަޅުތަކަކީ ދުނިޔޭގައިވާ އެހެނިހެން ސިއްޙީ ދާއިރާތަކަށް ވެސް ވަރަށް ބޮޑެތި ފައިދާތަކެއް ކުރާނެ ކަންކަމެވެ.